राधाकृष्ण विखे पाटलांनी निषेध करायला हवा होता-बाळासाहेब थोरात

विखे घराण्याचे वागणे अहमदनगरच्या जनतेलाही आवडणार नाही, असे थोरात म्हणाले. काँग्रेस पक्षाने आतापर्यंत विखे कुटुंबीयांना भरभरुन दिले. मागेल ती पदे दिली. ही वेळ पक्षाला उतराई होण्याची होती. मात्र, पुत्रहट्टापुढे विखे पाटील झुकले. त्यांनी मुलाला समजून सांगायला हवे होते. त्याला रोखायला हवे होते. . पक्ष सांगेल ते मी करेल, असे विखे म्हणतात. पण, ते मुलाला रोखण्यात अपयशी ठरले. याचे स्पष्टीकरण त्यांना द्यावे लागेल. ते आता काय बोलणार याची उत्सुकता सगळ्यांनाच आहे, असे थोरात यांनी सांगितले. विखे राजीनाम देऊन भाजपमध्ये गेले तर तुम्ही विरोधी पक्षनेतेपद स्वीकाराल काय, असा प्रश्न वार्ताहरांनी विचारला. त्यावर थोरात म्हणाले, की पक्षाने दिलेली प्रत्येक जबाबदारी मी आजवर इमानेइतबारे सांभाळली आहे. यापुढेही सांभाळेल.

काँग्रेसकडून नगर दक्षिण लोकसभा मतदारसंघासाठी उमेदवारी मिळाली नसल्यामुळे डॉ. सुजय विखे-पाटलांनी मंगळवारी भाजपमध्ये अधिकृतपणे प्रवेश केला आहे. त्यानंतर सुजयचे वडील विरोधी पक्षनेते राधाकृष्ण विखे-पाटील यांची पुढील भूमिका काय असणार, याबद्दल राज्यात सर्वत्र उत्सुकता आहे. त्याबरोबरच काँग्रेसकडून त्यांच्यावर कोणती कारवाई होऊ शकते का? याबद्दलही तर्कवितर्क लढवले जात आहेत.