दिल्ली: धर्माच्या नावावर मतं मागत आचारसंहितेचं उल्लंघन करणं बसपा प्रमुख मायावती आणि उत्तर प्रदेशचे मुख्यमंत्री यांना भोवलं आहे. निवडणूक आयोगाने मायवती यांना दोन दिवस तर योगीं योगी आदित्यनाथना तीन दिवस निवडणूक प्रचार करण्यास बंदी घातली आहे. यासोबतच मेनका गांधी आणि आझम खान यांना ४८ तास प्रचार बंदी निवडणूक आयोगाने घातली आहे हे विशेष.या काळात हे सर्व नेते कोणताही रोड शो करू शकणार नाहीत. त्यांना निवडणूक प्रचार सभाही घेता येणार नसून निवडणूक रॅलीतही भाग घेता येणार नाही. १६ एप्रिल रोजी पहाटे ६ वाजल्यापासून ही बंदी लागू होणार आहे. मायावती आणि योगींवर निवडणूक आयोगाने घातलेली बंदी ही २०१९च्या लोकसभा निवडणुकीतील सर्वात मोठी कारवाई आहे.
निवडणूक आयोगाच्या निर्णयानुसार योगी आदित्यनाथ १६, १७ आणि १८ एप्रिल रोजी तर मायावती १६ आणि १७ एप्रिल रोजी प्रचार करू शकणार नाहीत. बंदीच्या काळात या दोन्ही नेत्यांना सोशल मीडियाचा वापर करता येणार नाही. त्यांना या काळात कोणतीही मुलाखत देता येणार नाही, असं आयोगानं स्पष्ट केलं आहे.मायावती यांनी उत्तर प्रदेशातील देवबंदमध्ये निवडणूक प्रचार सभेदरम्यान मुस्लिम समुदायाला सपा-बसपा महाआघाडीलाच मतदान करण्याचं आवाहन केलं होतं. धर्माच्या नावावर मतदान मागण्याच्या नियमाचं उल्लंघन केल्याप्रकरणी मायवतींवर कारवाई करण्यात आली आहे. तर योगी यांनी विरोधकांना ‘अली’ आवडतो तर आम्हाला ‘बजरंग’ बली आवडतो, असं विधान करत धर्माच्या नावावर मतदान करण्याचं आवाहन केलं होतं. त्यामुळे दोन्ही नेत्यांकडून निवडणूक आयोगानं खुलासा मागत त्यांना फटकारले होते.दरम्यान, सर्वोच्च न्यायालयाने मायावती यांच्या देवबंदमधील भाषणावर आक्षेप घेतला होता. धर्माच्या नावावर मतदान मागणाऱ्यांविरोधात आयोग काय कारवाई करत आहे? असा सवाल न्यायालयाने केला होता. या नेत्यांना केवळ नोटीस बजावण्यात आली आहे. कठोर कारवाई का केली जात नाही? असा सवाल करत न्यायालयाने आयोगाला फटकारले होते. त्यानंतर आयोगानं ही कारवाई केली.
Subscribe to Awaz VIdarbha Nagpur
